ديوان :
منـوعات غنائيـة
تأليف :
زينــات السـخــاوي
.....
.....
إهــــداء
……..
.. إلى زوجي.. الراحل إلى رحمة السماء..
.. وإلى أبنائي - محمد وحسام - اللذين كانا لي من بعد رحيله.. هدية السماء..
.. وإلى الأدب والشعر والزجل..
الذين أسافر على أجنحتهم دوماً..
من ضوضاء الأرض.. إلى أنوار وموسيقي السماء..
المؤلفــة:
زينـات السخاوي
******
كلمـة عـن الديوان
بقلم الشاعر والناقد العروضي : محجـوب موســى
……..
...... الشاعرة / زينات السخاوي، شاعرة فطريّة لا تعمُّل ولا تصنـّع ولا افتعال لديها، فهي ترسل القول على سجيّتها، ولا تخلو بعض نصوصها من إنسانية وطرافة.
فمن حيث الإنسانية تطالعنا بحبها الصادق لأختها الكبيرة (أختي الكبيرة) خلال تعبير أخوي حميم، والطرافة نراها في (وفاء) وحين تخاطب قطتها (بسبسة) مازجة طرافتها بإنسانية واضحة.
أمّا الوطن فله النصيب الأوفى من نصوصها، وكذلك الحديث عن نهضتنا وريفنا الجميل.
وشاعرتنا إنسانة حنون، فمن عرفها فقد عرف حب الناس والخير مجسّداً في شخصها الذي لا يملك الإنسان إلاّ الانحناء له احتراماً، في زمن قلّ فيه الحنان والأمومة والصدق.
وأترك للقارئ معايشة هذه المشاعر الطيبة عبر كلماتها المنسابة دون افتعال.
******
(( أغـانـي دينيـــة ))
……..
دعـــــاء
……..
يا رب انا عبدك طالب
رضاك ما تحرمنيش منّه .
لا مال ولا جاه ولا حاجة
غير الرضا ما اسأل عنّه .
قوّيني ع الطاعة وخلّي
حياتي للطاعة تملّلي .
مهما أمدحك ملقاش تعبير
يقدّر يصوّر لك حبّي .
ومين يصوّر فضل كبير
عظيم سواك انت يا ربي .
قدرك ما يوصفهوش غيرك
وكل قول فضلة خيرك .
كل المنى ف الآخرة
أشوف وجهك وأنعم بجوارك .
واعيش ف ضلك يا حبيبي
وتفيض عليا بأنوارك .
وهوّه دا وبس منايا
مش حاجة تانيه يا مولايا .
******
تــوب الهـدايــة
……..
ياللي الزمان ضيّعك غرك وتهت معاه
وعشقت نور دنيتك ونسيت فروض الله .
ضيعت عمرك هدر آه من غرورك آه
لبست توب المعاصي والشيطان غواك .
عامل حساب دنيتك والآخرة ناسيها
ونسيت فروض ربنا في مصبحك ومساك .
والفانية ضحكت عليك وعشِقت لياليها
باب المتابة اتفتح لك وانت ويّا هواك .
طاوعت نفسك ونفسك زايدة معاصيها
إخلع ثياب الغرور دي تقوتك أحلى .
كما الفل نور الطهر بيحليه
توب المعاصي ما يسترش وأوام يبلى .
ياللي الزمان ضيّعك غرك وتهت معاه
دي النار حطبها اللي عاشوا عمرهم فيها
رخـّصت روحك وروحك ملك خالقها .
طهر ف روحك وسيبك من بلاويها
واعمل عشان أخرتك وسيبك من الدنيا وزواقها .
وصوم وصلي ولا تنسى فروض الله
واعمل حساب أخرتك والفرض ما تنساه .
دي نصيحه من عبد زيك برضه ضلّ وتاه
وبعد توبة نصوحه أكرمه مولاه .
ياللي الزمان ضيّعك غرك وتهت معاه
******
طهـر قلبــك
……..
طهرّ قلبك واحمد ربّك
واخلص كل الدنيا تحبّك .
طهر قلبـك
اللي بيبقيٍ عليك إحسن له
تكسب حبّه .
على الإحسان والطيّب دلّه
نوّر قلبه .
شاف النور قلبه يدعي لك
ولا ينساش طول عمره جميلك .
واخلص كل الدنيا تحبّك
طهّر قلبك .
إحمد ربّك على ما عطالك
ح يزيد خيرك .
جل الله من خيره إدّالك
إدّي لغيركّ .
عيش على قدّك واعرف حالك
واوعى في يوم تتغر بمالك .
واخلص كل قلوبنا تحبّك
طهّر قلبك .
انسى الظلم وحاسب منه
وانسى الغيبة .
أما الكذب راح أقولك عنه
دا أكبر عيبة .
عيش أيامك
واوفي عهودك .
دايما يلمع
نجم صعودك .
واخلص كل قلوبنا تحبّك
طهّر قلبك .
******
العمــل الصــالح
……..
مولانا هو ربنا
وصانا بالخير كلنا .
واللي عمل صالح في يوم
يترد له عز وهنا .
قال القناعه كنز باقي مع الدوام
يا سلام عليه .
إيه في الطمع غير سيئات وحرام
وطْمِعْنـَـا ليــه .. ؟ !
قنوع نحبك كلنا
تطمع ما تبقاش مننا .
واللي عمل صالح في يوم
يترد له عز وهنا .
مــــــولانــا هـــــو ربنـــــــا
رسوله وصاك ع الجيران والجار حبيب
ليه بتعاديه .
ولو نويت ع الحسنة أولى بيها القريب
واعطف عليه .
ولو غريب جا حيّنا
نوده زي ما ودنا .
واللي عمل صالح في يوم
يترد له عز وهنا .
مــــــولـي المـوالـي ربنـــــــا
راعي الإٌله تكسب رضاه
واسي اليتيم ولا تغضبوش .
وأبعد عن الناس اللئام
بيفرقوا ما يجمعوش .
وحب وطنك زينا
دي عزته من عزّنـا .
واللي عمل صالح في يوم
يتر د له عز وهنا .
مــــــولـي المـوالـي ربنـــــــا
******
خليـك صـريح
……..
خليك صريح تكسب بصحيح
وتلقى عمرك عمر بجد .
وتملا أيامك تفاريح
والدنيا تصبح بهجه وسعد .
لو تمشي دوغري تعيش شريف
دايما ويصفا لك جوّك .
ولو حضرت ف أيّ مكان
راح يسمعك حتى عدوّك .
ويبقي لك سُمعة جميلة
والناس تكون أهل وعيلة .
اللف والدوران بيضر
ولا تلقى بين الناس صاحب .
وبالصراحة تكون الحر
والكل بيك راح يتعاجب .
الحق قوله ولو حاتموت
دا الحق عمر جديد وخلود .
الميّه هوّه وهوّه القوت
بالخير عليك دايما حايعود .
******
سبحــان اللـه
……..
سبحانه رب القدرة عظيم
سبحـان الله .
سبِّح بحمده رؤوف ورحيم
اللـــــــه اللـــــه .
سبحــــــان الله
الورد فرحان على غصنه
جماله من صنع الخلاق .
سبحانه من زوّق حسنه
ولونه ولف الأوراق .
عاطر يهني الروح محلاه
سبحانه ربي وحلو نداه .
والكون بينطق باسم الله
سبحان الله .
عصفور جميل تلقاه طاير
هنا وهناك ويروح لبعيد .
وتشوفه ع الأشجار صابر
بيلم رزقه بقلب سعيد .
مين اللي رازقه ومين هناه
سبحانه خالقه ولا بينساه .
وإنما يبقى معاه يرعاه
سبحان الله الله الله .
ف ليل نهار وصباح وغروب
وفي الشتا وخريف وربيع .
نظام في علم الله مكتوب
وسر من أسراره بديع .
ده ملك ربي نشاه وبناه
سبحانه جل الله في علاه .
ويا بخت من سبّح مولاه
******
مـن وحـي شهـر الصيـام
……..
يا للي انت مالي ومالك تكنزه بالكوم .
قوم ارضي ربك وذكي في ليالي الصوم .
وارضي اليتامي وواسي من يكون محروم .
دي حفنة منك تزيل عنه كروب وهموم .
رمضان كريم والكرم ح يعود عليك ويدوم .
إوفي عهود ربنا سبحّ وصلي وصوم .
يديم عليك نعمته وح يرزقك بالكوم .
يغفر ذنوبك وستره يبقي وياك دوم .
تتهنى في دنيتك وتشوف صفا الأيام .
والحسنة قال لك بعشرة ويستحيل تنضام .
تكنز .. تقضي حياتك بين عذاب وظلام .
ده غير في يوم القيامه رح تقاسي آلام .
ياللي انت مالي ومالك تكنزه بالكوم .
******
أوبريت : رمضــان كريـم
……..
أصــوات ( مدافع )
الصغار مبتهجون ويصيحون صيحات الفرح ( أغنية الهلال )
……..
ضربوا المدافع والزينات منقادة
شهر الصيام شرفنا يالاّ العادة .
وكل عام وانتوا ف هنا يا حبايب .
وكل عام والخير علينا زيادة .
……..
ضربوا المدافع لما شافوا هلاله
زاهي منوّر في السما يا جماله .
والشرق كله م الفرح غنّى له
وتحيته تقوى وصيامه عبادة .
ضربوا المدافع والزينات منقادة
شهر الصيام شرفنا يالاّ العادة .
يا عام جديد جانا ف نعيم نصرتنا
ونور هلاله الزاهي حيّا رايتنا .
الله يديم الخير على أمّتنا
وكل ماده نشوف علا وسعادة .
ضربوا المدافع والزينات منقادة
شهر الصيام شرفنا يالاّ العادة .
……..
شهر الصيام شرّفت زي عاداتك
كريم وكلّ السعد في أوقاتك .
والنصر لبلادنا دا من بركاتك
والمجد صافحها وباسمها نادى .
ضربوا المدفع والزينات منقادة
شهر الصيام شرفنا يا لاّ العادة .
……..
موكـب مشـايخ الطـرق
مجموعــة :
اللـه اللـه .. لا إله إلا اللــــه .. مولانا
سبحان اللـه .. حي دائم .. سبحان اللـه
حمـدا للــه .. يرضي الصائم .. حمـدا للــه
هو الوهّاب .. اللــه اللــه
هو التــوّاب .. اللــه اللــه .. أعطانا
اللـه اللـه .. لا إله إلا اللــه .. مولانا
……..
هو المعبود .. هو الرحمن .. سبحان اللـه
هو الموجود .. في كل مكان .. حمداً للــه
هو الستّار .. اللـه اللــه
هو الغفّـار .. اللـه اللــه .. هنّانا
اللــه اللــه .. لا إله إلا اللــه .. مولانا
……..
موكـب الأطفـال :
يا صايم قوم افطر
ع الكحكة أم سكر .
واحمد ربك ح تلاقي
خيراته تزيد وح تكتر .
……..
لو ما الحبايب ما جينـا يا الله الغفّار
ولا تعبنا رجلينا يا الله الغفّار
والله سنه خضرا علينا يا الله الغفّار
وخيرها زايد حوالينا يا الله الغفّار
يا صايم قوم افطر على الكحكه أم سكر
واحمد ربك ح تلاقي خيراته تزيد وتكتر
……..
بائع الحلوى ( شــريـك)
طازه وجميل يا شريك
لذيذ يا قلبي عليك .
حلـو وجميـل يا شريك
أكلة وعلى المعدة خفيفة
حلال على الصايمين .
والوزنة دي بالتعريفة
مين اللي عايز مين .
مليان بالجوز
لذيذ يا شريك .
وزبيب على لوز
لذيد يا شريك .
لذيذ يا قلبي عليك
حلو وجميل يا شريك .
……..
موكـب من الأطفـال :
على قهوة بابا .. تعالوا ياولاد .. تعالوا ياولاد
شاعر بربابة .. هناك ياولاد .. تعالوا ياولاد
بيقول وينادي .. كتير ياولاد .. تعالوا ياولاد
في مديح الهادي .. جميل ياولاد .. تعالوا ياولاد
……..
شـاعـر الربابــة :
أصلي على النبي الهادي محمد
نبي عربي مظلّل بالغمامة .
يقول الفتى الشاعر سمير الليالي
على الوحدة وما فيها من شهامة .
أمانه يا عرب والشرق ليكم
وتلقو الاتحاد عزّة وكرامة .
وسوريا ومصر دلوقت اتحادهم
فتح باب المعالي والسلامة .
أيديكم يا عرب ف أيدينا بالله
إلا ما الفرقه والهجران إلا ما .
يميناً لو يمينكم في يميننا
ح يبتسم الزمن أحلى ابتسامة .
واختم قولي بسلامي وصلاتي
على الهادي المظلّل بالغمامة .
……..
أدبــاتــي :
يا ليل يا ليل يا للي آمُان
يا ليل يا ليل ياللي أمان .
أنا الأديب وأنا الدبدوب
أنا اللي قولي مافيهش عيوب .
بامسّي ع الراجل الحبوب
صاحب المكان ده وع الجدعان .
يا ليل يا ليل ياللي أمان
يا ليل يا ليل ياللي أمان .
أنا جي امّسي ما امّسيش ليه
دا شهر غالي يا روحي عليه .
بدر وشهور السنة حواليه
نجوم وبتغنّي له كمان .
يا ليل يا ليل ياللي أمان
يا ليل يا ليل ياللي أمان .
تاني سنه يجينا يا إخوان
في نصر نور وأمل وأمان .
فلتحيا دولتنا يا عربان
وتعيش رايتها ف أعلا مكان .
……..
شـامــي :
هوى.. هوى دخيلك الله يا أخي..... توما صرنا سعدا
وها الشرق تبعنا تاتعيش فوج فوج وراية الأمة
بتصير باذن الله بأعلا قمة
أدبــاتــي :
أهلا أخويا حبيب الروح
معاك معاك ومنين ما تروح .
طيرين وغنّوا ف أجمل دوح
أجمل أغاني الوطنيّة .
مجموعـة :
عاليا دي اليادي اليادي
يابو لعباديّه .
يا رب تديم العزة دي
ع الأمة العربيّة .
ســــوري :
مرحب يا شهر البركة
عدت بتهانينا .
هلا بارك ها لحركة
وشاركنا ف أغانينا .
ادعي العاقبة للباقي
وياما اسعدها بقيّة .
مجمـوعــة :
عاليا دي اليادي اليادي
يا لعباديه .
يا رب تديم العزة دي
ع الأمة العربية .
ســــوري :
سبحانك الله
جمعت بالوحدة شملنا .
وصرنا نحن العرب
مصر وشام لنا .
يا رب لاجل النبي
ومن أجل شهر الصوم .
تديم علينا الصفا
ويّا الوفا يوم ورا يوم .
مجموعـة :
عاليا دي اليادي اليادي
يا لعباديّه .
يا رب تديم العزة
ع الأمة العربيّة .
……..
أصــوات طبول الدراويش
أطفـال :
ادي جلوة الدراويش هالّة
ياولاد ياولاد .
جايين وورا منهم شلّة
ياولاد ياولاد .
تعالوا نتفرّج يالا
ياولاد ياولاد .
أدي جلوة الدراويش هالّة
ياولاد ياولاد .
……..
الدراويـش :
شهر الصيام أتى تحلو قطائفُهُ
والريق يجري إذا فاحت كنائفُهُ .
يا رب لا تحرمنْ من خيره أحداً
شهر كريم توافينا لطائفُهُ .
……..
درويـش :
يامن يناديني ويرحم بطنيه
إذا الفطور بأكله نادانيه .
أنا لا أريد الفخفخه في أكليه
إنَّ القناعةَ يا اخي من طبعيه .
……..
مجموعـة :
من أجل شهر الصوم نحن نضيّفك
أهلا وسهلا مرحبا لا نكسفك .
قل ما الذي يرضيك من أكل تجد
نعطيك ما ترجوه قل... ونحلّفك .
……..
درويــش :
لا مانعُُ من وزةٍ أو بطةٍ
أو ذِي وذِي إن القناعةَ دَأْبيه .
والرز طبعا والفطير وشوربة
لكوارعٍ كيما تصحصح بطنيه .
وسلاطة ومخلل متفرنج
والحلو هاتوا كل صنف عنديه .
اني قنوع فاعزموني واعلموا
أن الجنان نصيبكم بدعائيه .
……..
مجموعـة :
كل ما تريد فإن شهر الصوم مضيافُُ كريم
كل ما تريد فاننا نعطيك والله العظيم
كل ما تريد وكل عام واحنا في خيرٍ عميم
شهر الصيام أبو المكارم والضيافة والنعيم
……..
المسـحراتي :
شهر الصيام نوّر علينا وجانا
لياليه جميله بالهنا مليانة .
يارب بارك فيه وزيد خيراته
وديم علينا عزّنا وهنانا .
تم.. تم.. تم.. تم.. (صــوت الطبلة)
يا نايمين ماتوحّدوا
من لا ينام .
صلوا وصوموا ومجّدوا
خير الأنام .
تـم تـم تـم تـم تـم تـم تـم تـم
شهر الصيام جه بالهنا
خيّر كريم .
وبعودة في كلّ سنة
واحنا ف نعيم .
تـم تـم تـم تـم تـم تـم
يا أم أحمد اتسحّري
وانوي الصيام .
وصلي لله وكبرّي
تلقي السلام .
مدفــع مدفــع
صوت المؤذن
الله اكبر الله اكبر لا إله إلا الله
******
(( أغانـي الأمـومـة
والمشــاعـر الأســريـة ))
……..
حنانك من حنان الله
……..
حنانك من حنان الله
وعطفك عمري يوم ما انساه .
يا نور الكون.. يا روح الروح
إلهي يحرسك في علاه .
يــا أمـــــــي
في بسمتك حب وأنغام
يا منوّرة الدنيا عليا .
وفي نظرتك فرح الأيام
وسحرها يهني عنيّا .
ليلك نهارك تراعينا
سهرانة دايما تواسينا .
يا نور الكون يا روح الروح
إلهي يحرسك في علاه .
يــا أمـــــــي
رضاكي من فضل الرحمن
ومن رضى المولى علينا .
تهدينا للخير والإحسان
والشر عنّه بتنهينا .
ما فيش في بالك إلاّ احنا
وفرحتك من أفراحنا .
يا نور الكون.. يا روح الروح
إلهي يحرسك في علاه .
يــا أمـــــــي
تعيشي على طول الأيام
ولا نتحرم يوم من حبّك .
يا نور على قلوبنا وسلام
قادر يطمن لك قلبك .
يا أمي ربنا يحميكي
دي الجنّه ما بين أياديكي .
يا نور الكون.. يا روح الروح
إلهي يحرسك في علاه .
يــا أمـــــــي
.....
- تم إنتاج الأغنية بإذاعة الإسكندرية ، غناء المطربة/ نسمة ، وتلحين/ سيد زكي .
- لينك : فيديو صوتي لأغنية حنانك من حنان الله https://youtu.be/3mIgSzL79fQ?si=S-IsRRgkBzt-DrU9
******
ولادي وحبايبـي
……..
ولادي وحبايبي .. يانني العيون
يا دقه ف قلبي .. بتمحي الشجون
ولادي وحبايبي .. يانني العيون
يا أملي ف حياتي .. وفرحي ف اهاتي
معاكم ليلاتي .. عشانكم أكون
ولادي وحبايبي .. يانني العيون
بضلل عليكم .. وعمري ف إيديكم
ببسمة عيونكم .. تروح الهموم
ولادي وحبايبي .. يانني العيون
ويأمر هواكم .. بشمس ونجوم
أجيبها في لحظه .. لو أقدر أطول
ولادي وحبايبي .. يانني العيون
******
تسـلمي يا بنـتي
……..
قد إيه خفه .. قد إيه غالية
وانتي في اللفة .. بهجـه الدنيا
فرحتي إنتي .. تسلمي بنتي
بنتي أحلامي .. روحي أنغامي .. فرح أيامي
بسمتك حلوة .. نظرتك غنوة
في الجمال صدفة .. والجمال انتي
قد إيه خفة .. تسلمي بنتي
يحرسك ربي .. على الدوام قربي .. يامنا قلبي
إنتي إنسية .. ولا حورية
تايهة مش عارفه .. إنتي إيه انتي
قد إيه خفة .. تسلمي بنتي
ماما وياكي .. قلبها معاكي .. روحها ترعاكي
ياما حانغني .. يوم ما تتهني
ليلة الزفة .. فرحها إنتي
تسلمــي بنتــي
******
إلهي ما يحرمك يابني
……..
بدعيلك أنا ف صلاتي
يا اللي انت النور ف حياتي .
تفرح والدنيا بيك تفرح
وتمن عليك .
وربنا بالخير يديك
ولا يحرم قلبك يوم
م الضنــا ويفــرّح قلبـك .
أنا قلبي عليك مشغول
وبحلم لك إنك تكون
دايماً ف إيديك أمانيك
وحياتك مالية عليك
أطفــال كـدا زي الســكر .
وربنا بالخير يديك
ولا يحرم قلبك يوم
م الضنــا ويفــرّح قلبـك .
تلعب بيهم تلاعبهم
يبقوا صحابك تصاحبهم .
ووقت الشدة تكون ليهم
يبقوا حبايبك تساندهم .
وربنا بالخير يديك
ولا يحرم قلبك يوم
م الضنــا ويفــرّح قلبـك .
******
أختـي الكبيرة
……..
أختي الكبيرة .. أنا كلي ليكي .
شهمة وأصيلة .. الله عليكي .
حبيبتي إنتي .. وزي طانتي .
لا يوم زعلتي .. ولا يوم بعدتي .
خدماني وخادمة الكل .. لون قلبك لون الفل .
وحنانك يشبه نينتي .. الله يخليكي يا أختي .
أختــــــي الكبيــرة
بيتك مفتوح .. للعيلة وعيلة العيلة .
وتملي نروح .. عندك ما هو إنتي أصيلة .
وشغلك الشاغل إحنا .. وتمللي بتحبّي فرحنا .
وحنانك يشبه نينتي .. الله يخليكي يا أختي .
أختــــــي الكبيــره
يا نهر صافي .. على الدوام .
بالخير موافي .. ويا السلام .
لما تزوريني .. بتفائل بيكي .
والخير بيجيني .. يا اختي على إديكي .
وحنانك يشبه نينتي .. الله يخليكي يا أختي .
أختــــــي الكبيــرة
ونصيحتك حلوة .. اسمعها ارتاح .
من بقك غنوة .. مليانة أفراح .
قلبك كبير .. ومساع الكل .
وأي عسير .. له عندك حل .
وحنانك يشبه نينتي .. الله يخليكي يا أختي .
أختــــــي الكبيــرة
في بيت العيله لمتّنا
في حضن أبونا ومامتنا .
ع الحب وتقوي الله كانت
من اول يوم تربيّتنا .
الله يرحمهم غلاوتهم
في قلوبنا حاتفضل لمماتنا .
وحنانك يشبه نينتي .. الله يخليكي يا أختي .
أختــــــي الكبيــرة
******
ريــح قلبــي
……..
ريح قلبي وافتح بيت
وياريت تسمع قولي ياريت .
نفسي يا إبني أفرح بيك
ولحضن الفرحه أوديك .
ريــح قلبـي الله يخـليـك
ليه العند وليه بتكابر
وبأيام العمر تغامر .
أيامنا إن راحت ما تجيش
أنا عرفاك ما تزعلنيش .
نفسي يا إبني أفرح بيك
ريح قلبي الله يخليك .
دانت ربيع فرحان بزهوره
ونهار بيصبح على نوره .
إيه المانع ما تخبيش
انا عرفاك ما تزعلنيش .
نفسي يا إبني أفرح بيك
ريح قلبي الله يخليك .
نفسي أشوف لك بيت وولاد
زوجه تحبك وانت ياواد .
في سعاده ويّاها تعيش
أنا عرفاك ما تزعلنيش .
ريــح قلبـي الله يخـليـك
******
أخــويـا وحبيبـي
……..
نهاية كلامي .. بداية سلام
وراحت آلامي .. مادمت ف سلام
يا اخـويـا وحبيبــي
وليه العداوة .. وسيرة القساوة
مادمنا حبايب .. يا خويا حرام
نهاية كلامي .. بداية سلام
ومين راح يفرق .. ما بين القلوب
دا قلبي وقلبك .. جناح الحمام
نهاية كلامي .. بداية سلام
يقولوا العوازل .. كلامهم كتير
وقلبك مَنَازل .. وخيرك كتير
نهاية كلامي .. بداية سلام
******
يامـــــه
……..
أمّه يا امّه يا امّه
حبّك حضن وضمّة .
انتي النور ف الضلمة
وانتي الناس واللّمة .
حبّك روح أيّامنا
وهنانا وأحلامنا .
ف سكوتنا وكلامنا
إنتي معانا يا أمّه .
ياما تعبتي عشانّا
عيّشتينا ف جنّة .
ولا يوم يبعد عنّا
عطفك إنتي يا أمّه .
******
(( أغـانـي الطفـولـة ))
……..
قطتـي يا بسبسـة
……..
يا قطتي يا بسبسة
دايماً لطيفة كويسة .
والناس تملي تحبها
ويّا القطط وتودها .
وف مرّة تعبت يا عيني
بنونوتها تناديني .
يا ريتني أعرف لغاها
لكنت أعالج عياها .
اللي يقرّب منها
اللي تملُّي يودّها .
يعــرف لغــاها وســـرها
وأنا قاعدة أبكي جنبها
أقول يا ربي كن لها .
شوفت القطط جم كلهم
وزعلانين من همهم .
علشان يواسوا أختهم
ترجع وتلعب عندهم .
جايبين دوا يشفي العليل
علشان ما يفرح قلبهم .
وعطوه لبسبس أختهم
خفت أوام وف وسطهم .
فرحت ولعبت بسبسة
اللي ف جمالها ملبسة .
يا قطتي يا بسبسة
دايماً لطيفة كويسـة .
******
السمكـة الشقيـة
……..
ظأطتي ظأطتي بالحنية
يا سمكتي يا طايرة على الميّه
يا حلاوتك كدا زي الفراشات
اللعب معاكي أصبح غيـّة
ح نلف أنا وانتي مع الموجة
وح نعمل بالألعاب هوجة
م النسمه ح نغزل غنوة جنان
ألحانها أنغام حب وحنان
أوقاتنا تكون حلوة هنية
ظأطتي ظأطتي بالحنية
من حبنا كل الصخر يلين
والسما ح تنور شوق وحنين
والنورس يشبع ملاغية
والشمس تدفينا وهي
حاضنانا بكل الحنيّة
ظأطتي ظأطتي بالحنية
******
بطـــوط
……..
بطوط بطوط .. لبس الزعبوط
جري وسطينا .. هيّص توت توت
بطــــوط بطـــــوط
صاحب الأطفال كدا من يومك
ونظيف وظريف شكل هدومك
وخصوصاً الورد ف زعبوط
بطــــوط بطـــــوط
ميكي ماوس صاحبك بنحبه
نقعد وياك نفرح جنبه
ونلمع ليك زر الزعبوط
بطــــوط بطـــــوط
فرّحنا كمان وادينا ألوان
لا تفرق بين بنت وصبيان
بيغنوا وراك آه يا أبو زعبوط
بطــــوط بطـــــوط
هات كورة ويلاّ نشوف ونشوط
علشان نكسب ناكل م التوت
ونسمي فريقنا أبو زعبوط
بطــــوط بطـــــوط
******
بنــوتـة صغيـورة
……..
أنا بنت وحلوة صغيورة
فرحانة بروحي ومبسوطة
فرحانه بماما وببابا
وجدو وعمي وستوتة
ف الصبح أنا باكل بسكوتة
ونهاري بيحكي الحدوتة
ويقول لي صباح الخير ياختي
أمورة وشطورة وإنتي
بنوتة وحلوة صغيورة
ف المسا أنا بعمل واجبي تمام
عربي وعلوم .. ويّا الأحلام ..
بتجيلي تقول لي دا إنتي سلام
يضحك ف الدنيا يفرحها
بنوتة وحلوة صغيورة
******
ع الجنينـة يا بنات
……..
ع الجنينة يا بنات
ع الجنينة يلاّ بينا .
ع الجنينة حبّة حبّة
بالورود ويا المحبّة .
نجري ونشبّك إيدينا
نجري ونفرّح عنينا .
ع الجنينة يا بنات
أدي وردة لونها بمبي
عطرها بيبوس ف خدي .
إيدي بتطبطب عليها
هي مدت لي ف إيديها .
ع الجنينة يا بنات
عصافير والريش مندّي
والجناح طاير لعّنْدِي .
يرمي ب الفرح ف وادينا
ترقص الضحكة ف عنينا .
ع الجنينه يا بنات
******
النظـافــة
……..
النظافة النظافة
هي عنوان اللطافة .
والنظيف دايماً نحبه
والجميع يتمني قربه .
والنظافة م الايمان
بيها يبقي لينا كيان .
النظافة النظافة
النظافة حاجة غالية
تبني لينا قيمة عالية .
واللي من غير النظافة
عمره ما حيعرف قيافة .
يا ابني كون راجل نظيف
ف المدينة أو ف ريف .
النظافة النظافة
أوعى تتحجج بفقرك
ولا تظهر لينا عذرك .
النظافة مش فلوس
النظافة ف النفوس .
ميّه أو بروة صابون
كل شيئ تلقاه يهون .
النظافة النظافة
******
أوبريت غنائي.. بمناسبة عيد الأم
عيديـن في عيـد
……..
مجموعة من الأطفال ينشــدون
هل الربيع فرحة مارس
عيد المحبة .. والأنوار
يا بسمه قومي إنتي وفارس
ننشد سوا ويّا الأزهار
عيد الربيع دا عيد ماما
دا عيد سعيد غنوله ياما
ح نقيم راياته ونقول هاله
يا مرحبا وألف .. سلامة
يـا مرحـبـا ... وألــف ... ســلامــة
وعيد هنا للأم سعيد
عيدين في ... عيد
عيـديـن فــي عيــد
المنظــر الأول :
طفل في حديقـة الأزهـــار يغنـي:
ح أقطف لماما كتير منها
في عيدها أقدمها هديّة
وأبوس من الفرْح يمينها
أدي ورده بيضا ح اخدهالها
رمز المحبّة ودليلي
يا رب منّي تقبلها
وتاخدها منيّ وتدعي لي
وراح أبقي سعيد عيدين في عيد
عيـديـن فــي عيــد
المنظــر الثـانـي :
الطفل الثاني في حديقة الزهـور يغني:
وانا راح اخدك يا بنفسج
لحياتي وروحي وقلبي
في إديها لونك يبهج
وح يوصف فرْحي وحبي
وتكون انت .. علامة
لهوايا في إيد.. ماما
وراح ابقي سعيد عيدين في عيد
عيـديـن فــي عيــد
الطفل ... الثالث
يغنــي:
وانا حاخد فلة وياسمينة
عنوان على حبي وعلى طاعتي
دي مامتنا وروحنا وعنينا
دلوقتي أروح ليها ف ساعتي
عيـديـن فــي عيــد
المنظــر الثالث :
الربيع يظهر منشدا :
أنا الربيع يا ولاد يالاّ
غنولي دا انتو الهنا والله
فداكم الزهر... بحاله
وكل حسني... يا اولادي
انتوا الربيع وانتوا جماله
وانتوا الهنا في الدنيا دي
دا فرحكم بيّه بيزيد
لما امكوا ترضي عليكم
واليوم بيصبح يوم العيد
واتمنيّ ربّي يخلّيكوا
وراح ابقي سعيد عيدين في عيد
عيـديـن فــي عيــد
المنظر الرابع :
مجموعة الأطفال يظهرون في الحديقة
ويقولون للربيع:
متشكّرين جداً جداً
ياسي الربيع دا أنت حنين
الربيـــــــــــــع :
لا شكر على واجب إبدا
دا كله علشانكم هيّن
الأطفـــــــال :
دا كرم كبير منك خالص
الله على الأخلاص الله
يا قلب للأطفال خالص
وعمرنا يوم ما ح ننساه
الربيـــــع:
لا شكر على واجب أبدا
كده الكلام وانا ويّاكم
وح أقول لكم كلمة وجيهة
أزهاري حلوة وعجباكم
وليه بقي تقسوا عليها
الأطفـــــــال:
أزهار جميله وعاجبانا
وليه صحيح نقسي عليها ؟
الربيـــــع منشــــدا :
أزهاري حلوه وعاجباكم
وليه بقي تقسوا عليها
مجمـوعـة الأطفــال :
يالاّ بينا يا ولاد بسلامة
سيبوا الزهور زي ماهيّه
ونروح نبوس ماما... كفاية
والبوسه دي أحلي ... هديّة
في المنزل... يدخل الأطفال منشدين للأم بعد الألتفاف حولها:
صباح الخير ياوش الخير
يا روح الروح صباح الخير
صبــــاح الخيــــــــر
الطفــل الأول
عيدك في عيد الربيع
وأنا جيت أقدم هديّة
من نبض قلبي المطيع
يا أكرم الناس عليا
الأم :
شكراً يا إبني الجميل
الله يخليك يا إبني
يا شهم حر وأصيل
يا طبع هادي وعاجبني
الطفــل الثــاني :
وأنا جيت يا ماما في عيدك
أهديكي حبي وقلبي
أبوس مع الشكر إيدك
وادعي يخليكي ياربي
( يقبـــل يــدهـــا )
الأم :
هديتك ما انسهاش
يا أغلى من قلب ماما
وبسمتك ما اسلاهاش
الله يزيدك سلامة
الطفــل الثـالث:
وانا جيت يا أمي باقول لك
عيدك دا عيد ... المحبّة
يا رتني أكبر في ظلك
واوفّي من ديني حبّة
الأم
يا ولادي فيه أم عزيزة
أعز منيّ مين هيّه ؟
الأولاد:
معقول يا ماما ؟ فيـه غيرك ؟
الأم:
يا ولادي أم الحريّة
مصر العظيمة الله يصونها
لينا وللدنيا دهيّه
الأولاد:
صحيح يا ماما الله يخّلي
بلادنا وانتي وأبطالنا
والحب يجمعنا تملّلي
وننول جميع اللي ف بالنا
الأم:
إفدوها بالأرواح
الأطفال: نفديها بالأرواح
الأم: والروح فدها سماح
الأطفال: والروح فدها سماح
تظهر فتاة ملتفة بالعلم المصري... يفرح بيها الأطفال حين يرونها ويرددون في صوت واحد :
أمنا أمنا مصر مصر أمنا أمنا
الأم تردد وتقـول :
غنولها يالاّ وقولولها
نشيد صفاها وهناها
دي حياتنا دايما ورايتنا
ح تعيش ترفرف ف علاها
أم السلام... والوطنية
مصر الأمل والحريّة
غنولها ياللا وقولولها
نشيد صفاها وهناها
دي حياتنا دايما ورايتنا
ح تعيش ترفرف في علاها
أم السلام والوطنية
مصر الأمل والحريّة
تظهـر مصــر منشــدة
يا فرحتي يا فرحتي
بجيل عبور حرّ ومجيد
دا أنتو هنا في دنيتي
يا ولادي والنيل السعيد
عبرتوا والمولي راعاكم
ويثبت المولي خطاكم
من أجل مصر بأكرم نصر
الأم والجميع:
الله عليكي يا أمي يا مصر
******
(( أغـانـي القــراءة
والكتــاب ))
……..
ياما القلم على الباب
……..
ياما القلم على الباب
حقق لي أحلامي .
ياما قلم ... وكتاب
بيهنوا أيامي .
يامـــــه يامــــــه
العلم نور وأمان
فيه رفعة الإنسان
ومجد أمتنا .
حلفت أعيش وياه
وف كل ساعة معاه
في المدرسة وبيتنا .
عمـلا له ألف حســاب
وعني عمـره ما غــاب .
يامـــــه يامــــــه
يا علم روحي معاك
عمري ما يوم أنساك
وللقلوب غنوة .
دا العلم كله جمال
مجد وعلا وكمال
من غيره إيه نسوي .
والجهل جوّاناضباب
وفوق عقولنا حجاب .
يامـــــه يامــــــه
ياما القلم ع الباب
خبط وقال يا احباب
حاسعد شيوخ وشباب .
طاوعوه ألوف والوف
دا العلم نور معروف
والجهل ما له احباب .
كله عذاب في عذاب
غلط ما فيهش صواب .
يامـــــه يامــــــه
******
كتــابـي
……..
كتابي كتابي .. يا أوفي صديق
وأحسن صحابي .. بحق وحقيق
كتـــابـي كتـــابـي
باقابل سطورك .. بفرحة وآمال
وأمشي في نورك .. لدنيا الكمال
سميري وزميلي .. يا صاحبي ودليلي
وأحسن صحابي .. بحق وحقيق
كتـــابـي كتـــابـي
في قلبك هداية .. بدرب الفلاح
وفيه الكفاية .. لكل النجاح
وحكمة عظيمة .. وآية كريمة
وأحسن صحابي .. بحق وحقيق
كتـــابـي كتـــابـي
كلامك تمللي .. محبة وسلام
عن الخير تقول لي .. بأفْيد كلام
يا نور المحبة .. يا أوفي الأحبة
وأحسن صحابي .. بحق وحقيق
كتـــابـي كتـــابـي
******
اقـــــرأ
……..
أول آية فـ القرآن
نزلت ع الهادي العدنان .
إقرأ وبإسم الرحمن
تدي القيمة للإنسان .
بعد ما كان جاهل مش عارف
أصبح له فـ الدنيا مكان .
إقــــرأ إقـــــرأ يا إنســـــــان
الجاهل ميت من يومه
ومالوش قيمة ما بين قومه .
إنما لو يتعلّم حبّة
راح ينهض يصحي من نومه .
إقــــرأ إقـــــرأ يا إنســـــــان
العلم بيرفع أصحابه
والعالم يصبّح أحبابه .
وتجيله وتدق أبوابه
والمجد يقبّل أعتابه .
ويكون له ف الدنيا نصيب
وكرامة وعزة وكيان .
إقــــرأ إقـــــرأ يا إنســـــــان
******
مكتبـة إسكندرية
……..
مكتبة إسكندرية.. حلم الأجيال اللي فاتت
والأجيال اللي جاية.
اتحقق على إيد الشرفاء
من كل أنحاء الكرة الأر ضية.
إتولدت مجرد فكرة.. في ضمير الإسكندر الأكبر
في قديم الزمان.
وبناها خليفته بطليموس الأول.. شجرة للعلم
ومنار للعقل ونور للوجدان.
وأيام وسنين كانت قبلة
ومرجع للعلماء والمفكرين.
وللشرق والغرب كانت كعبة
بتطوف حواليها العقول.. من كل حضارة وكل دين.
لكن للأسف سواد الجهل وإيد البطش
حجبوا نور العلم بنار الطغيان.
واتحرق المعني الجليل والكنز الثمين
وانهزمت الفكرة وانهدم البنيان.
لكن دايماً المعاني النبيلة
بتمد بجذورها في كيان الإنسان.
فاتولدت الفكرة من تاني
في زمن تاني.. لكن بنفس المكان.
والمنارة التاريخية بقت إلكترونية
تنشر نورها بكومبيوترات وإنترنت لكل الأوطان.
وشجرة المعرفة بقت رقمية
والمعلومات بقت هي الثروة وأكبر ضمان.
……..
والمعني من حكاية المكتبة كبير
والآية القرآنية بتقدم الرد.
«فأما الزبد فيذهب جفاءً
وأما ما ينفع الناس فيمكث في الأرض».
******
أوبريت«القراءة للجميع»
نص نثري مُمثـّل
……..
مجموعة من الأطفال يرددون:
القراءة للجميع.. شعار جميل.. حبناه كلنا.
وحفظناه بدون تسميع.. من ساعة ما ماما سوزان اختارته لنا.
ومن يومها.. واحنا معلوماتنا كل يوم.. بتزيد.
وكل يوم نفتح عينينا على مكتبتنا.. نقرأ ونتعلم شيء جديد .
ما هي القراءة للجميع.. شعار جميل.. حبناه كلنا.
وحفظناه بدون تسميع.. من ساعة ما ماما سوزان اختارته لنا.
القراءة للجميع.. القراءة للجميع
……..
.. طفل واحد يقف على المسرح ويغني: (عمره حوالي 12 سنة)
علشان كده.. نفسي لما أكبر أبقي ناشر .
علشان أعيش بين الكتب.. وبنفسي أباشر .
صدور الكتاب.. من الأول.. للآخر .
كنت زمان.. بقف بالساعات.. على سور الأزبكية .
أبحلق في الكتب.. اللي فيها الحكايات.. واتمني أقراها بعنيّا .
ولما أروّح.. لوالدي أقول.. نفسي أشتري كتب كتير .
يرد ويقول: على عيني يا بني.. ما انت عارف مسئولياتي كتير .
لكن.. دلوقتي..
القراءة للجميع.. شعار جميل.. حبناه كلنا .
وحفظناه بدون تسميع.. من ساعة ما ماما سوزان اختارته لنا .
.. ويخرح الطفل من المسرح وهو يجري ويقول:
القراءة للجميع.. القراءة للجميع
……..
المنظر الأول:
.. مجموعة أطفال تظهر على المسرح وهم ينشدون معاً في صوت واحد (وخلفهم ديكور على شكل مجموعة أحياء. وكل حي تظهر فيه لافتة «المكتبة».. ويظهر أمام الديكور عدد من الأطفال يجلسون على مائدة داخل مكتبة ويقرأون الكتب)
الأطفال ينشدون في صوت واحد:
في كل حي.. وكل حارة.. المكتبة بقت لنا منارة .
نقرأ ونتثقف.. ونزداد شطارة.
ونزيح من قلوبنا الجهل والمرارة .
ما هو القراءة للجميع.. بقت.. شعار جميل حبناه كلنا .
وحفظناه بدون تسميع.. من يوم ما ماما سوزان اختارته لنا .
ويخرجون من المسرح يجرون خلف بعضهم ويرددون :
القراءة للجميع.. القراءة للجميع
……..
المنظر الثاني:
طفل جديد يظهر على المسرح مرتدياً ملابس بسيطة ويغني: (عمره حوالي 15 سنة)
أنا.. أبويا طلّعني من المدرسة وكان أملي أروح الجامعـة .
طلّعني اشتغل واساعده في مصروف إخواتي السبعة .
لكنيّ حبيت النجارة فاتعلمتها.. ومن يومها.. بقيت صنايعي آخر شطارة.
لكن.. طول عمري.. عيني على الكتاب.. في الشغل والبيت والحارة.
وهو اللي خلاّني.. في صنعتي.. بزداد مهارة .
لأني اتعلّمت منه كتير.. وانا صغير.. وانا كبير .
علّمني الصبر.. والأمانة.. وحسن التدبير .
وعلّمني أنجز عملي بدون تأخير .
وإني دايما على المكتبة بعد الشغل.. أطير .
يجري الطفل ليغادر المسرح ويردد:
ما هو دلوقتي بقت.. القراءة للجميع.. شعار جميل.. حبناه كلنا .
وحفظنا بدون تسميع.. من يوم ما ماما سوزان.. اختارته لنا .
القراءة للجميع.. القراءة للجميع
……..
المنظر الثالث:
يظهر على المسرح طفل ثالث مرتدياً ملابس بسيطة ويغني: (عمره حوالي 10 سنوات)
أنا.. كنت بحب المدرسة وشاطر في دراستي.. وحالتنا كانت كويسة .
وكنت بحب القراءة.. بس أبويا مات
وكان ليّا.. كتير اخوات .. فاتغيّر حالنا.. بعد موته .
وداخت أمي.. على المعاش والورث ما بين اخواته .
وعلشان كده طلعت من المدرسة
وشغّلتني أمي صبي مكوجي.. كان بيديني يوميّه كويسة .
وبعد الوردية.. أجري وأختي ملبسة
على مكتبتنا.. في حارة ترمسة .
نقرا ونتثقف.. في كتب جميلة.. مصورة.. ومفهرسة .
وناوي لما أكبر.. أفتح محل مكوجي بالبخار .
وبقولها بجد.. وكلّي تصميم وإصرار.
واللي فاتني.. علشان ظروفي.. في عز صبايا .
بادعي لربنا.. يعوّض لي في ولادي.. كل منايا .
فالقراءة علّمتني.. إن الحياة اختيار.
ولازم يكون لي فيها.. هدف وشعار.
علشان كده.. القراءة للجميع.. بقت شعار حبناه كلّنا .
من ساعة ما ماما سوزان اختارته لنا .
وحفظناه بدون تسميع.. وبقي حياتنا في نومنا وفي صحونا .
ويغادر الطفل المسرح ويردد:
القراءة للجميع.. القراءة للجميع
……..
المنظر الرابع:
(حجرة متواضعة فيها سرير بسيط وكنبة قديمة في حي شعبي)
وتظهر على المسرح فتاة صغيرة حوالي ١٤ سنة بملابس بسيطة وتقوم بتغطية أشقائها النائمين ببطانية قديمة.
وتتجه بوجهها للمسرح وتغني:
رغم ظروفي القاسية .
مصممة على العلم وراسية .
واخواتي كمان مش ناسية .
باحبّبهم في العلم.. واخدهم بالمسايسة .
وفي الأجازه.. كل يوم نروح المكتبة .
نقرا قصص كتيرة.. جميلة ومهذّبة.
ما انا أصلي باشتغل في المكتبة.. عاملة تنظيف .
وبعد الظهر جليسة أطفال.. أصل الرزق يحب الخفيف .
وزي ما أنا ها فضل على الصعاب مدّربة .
كمان دايماً ها أكون بالقراءة.. في وقت الفراغ مرّحبة .
واتصاحب مع كل كتاب جميل وبديع .
ما هي القراءة بقت شعار للجميع
من ساعة ما ماما سوزان قالت لنا .
كلّ مكتبات بلدنا بقت لنا .
علشان كده.. القراءة للجميع.. بقت شعار حبّناه كلّنا .
وحفظناه بدون تسميع.. وبقي حياتنا في نومنا وفي صحونا .
من ساعة ما ماما سوزان اختارته لنا .
ويظهر كل الأطفال معا ويرددون:
وبقت كلّ مكتبات بلدنا.. لنا .
القراءة للجميع.. القراءة للجميع
******
(( أغـانـي وطنيــة ))
……..
مـا أغـنيــش ليـه
……..
ما اغنيش ليه وانا فرحان
بأمجادي وقلبي سعيد .
مع اكتوبر نعيش في أمان
ويوم ورا يوم فرحنا يزيد .
مـا اغنيــش ليــــه
ناديت للمجد وناداني
وبانت دنيتي حلوة .
ونور السلم خلاني
يوماتي أسمعه غنوة .
ح اغني لبكره وافراحه
وشعب يضحي بارواحه
كانت لي آمال
وحققها بطل غالي .
ورايتي العالية بترفرف
وداعيه لي .
مع اكتوبر نعيش ف أمان
ويوم ورا يوم فرحنا يزيد .
مـا اغنيــش ليــــه
ما اغنيش ليه وانا الفرحان
بنيت للدنيا أهرامي .
بكفي وروحي بحرسها
واحقق كل احلامي وأبنيها وأدرسها.
وراح ابني وأبني كمان
ويفضل خيره لعيالي وربي يبارك البنيان .
دا أنا ابن النيل تاريخي جميل بيرضيني
ويفضل خيره لعيالي .
مـا اغنيــش ليــــه
تاريخي الحر ف الدنيا معليني
وفجره بنوره بيجيني يصحيني .
عرفت الأتحاد قوة
بنيت على ضيه أحلامي .
وبالإخلاص وبالتقوي لقيت النصر قدامي .
ونسكت ليه ما دمنا بالعمل نعلا
وايماننا مخللنا التعب يحلى .
جاهدت ونلت آمالي كمان وكمان
وف بلادنا نعيم متصان .
مع أكتوبر نعيش في أمان
ويوم ورا يوم فرحنا يزيد .
مـا اغنيــش ليــــه
******
ســينــا
……..
سينا يا سينا يا سينا يا سينا
يا أملنا وبهجة ليالينا .
ياما بكره حانخضـّر أرضك
ونوفــّي الدين اللي علينــا .
ونصـونــك دايمـــا بعنينـــــا
الله أكبر أحلي نشيد
يتغنــّي بيـــه الأبطــــال .
والمدفع صوته تغريد
ورجالك دول أغلي رجال .
ونصـونــك دايمـــا بعنينـــــا
أهو داير فيكي التعمير
والكل يساعد وبيبني .
ومقامك عالي وكبير
وجمالك دايما يعجبني .
ونصـونــك دايمـــا بعنينـــــا
وترابك فيه دّم ولادنا
بيخضـّر أرضك يا حبيبة .
ويرجّع عزّة أمجادنا
بالحب الخالص والطيبة .
ونصـونــك دايمـــا بعنينـــــا
******
أجمـل عيــد
……..
سته أكتوبر يا أجمل عيد
أهلاً بيك وبفرح جديد .
يالله نغني نقول ونعيد
أحلى أغاني وأحلى نشيد .
سـتة أكتوبـر يا أجمـل عيـد
يا عيدنا واحنا قلوبنا معاك ..
يا يوم علانا وكرامتنا .
دا كل يوم ذكراك ع البال بتفوت ..
ترفع وتقوي عزيمتنا .
عيد الأحرار
ستة أكتوبر يا أجمل عيد .
أنوار أنوار
أجمل ذكري وأحلى نشيد .
هليت علينا بنصر جديد
ستة أكتوبر يا أجمل عيد .
سلام يا عيدنا وأحلي سلام
غنت بنورك عروبتنا .
وبكرة ياما تشوف الأيام
كتير قوي من وحدتنا .
عيد الأحرار
ستة أكتوبر يا أجمل عيد .
أنوار أنوار
أجمل ذكري وأحلى نشيد .
سـتة أكتوبـر يا أجمـل عيـد
جيتنا بهناك ومعاك السعد
والنصر بادي في كل مكان .
وبروح قوية وفينا العهد
وعشنا فيك سِلم الشجعان .
عيد الأحرار
سته أكتوبر يا أجمل عيد .
أنوار أنوار
أجمل ذكري وأحلى نشيد .
سـتة أكتوبـر يا أجمـل عيـد
******
أنـا العـــربي
……..
باقولها والحق ف قولي ..
حرام عليكم بترولي .
بإيديا أموّن طيارة تقصف إخواتي !!
وأمشـّي دبابة تحارب بلدياتي !!
أبداً ومش ممكن أغزل
غير على نولي .
يا دنيا شاهدي أفعالي تلاقيها نضال .
من أجل تحرير أوطانـّا وف كل مجال .
يا معتدي لا .. ولا نقطه من برميلي.
أولى بيها أهلي وفراتي وأرضي ونيلي .
وموت بحسرة يا مستعمر ويّا عزولي .
ولا نقطة واحدة حاتنوبك من بترولي .
******
يـا ابــن النيــل
……..
صباح الخير يا وش الخير
يا إبن النيل .
نهارك فل يا سيد الكل
يا شهم أصيل .
يــا ابــن النيــل
يا غالي ومنبتك غالي
بلادك جنة محلاها .
ورايتك زاهية في العالي
شعاع الشمس حيّاها .
يداعب بالرضى نجومها
ويسعد بالصفا يومها .
ترفرف له
يلاقي العز في هلالها .
وتوصف له
معاني الحب في وصالها .
صباح الخير يا وش الخير
يا إبن النيل .
صبــــــــــاح الخيـــــــــــر
يا ثابت والهرم شاهد
وصنت العزة لبلادك .
بعزم فراعنة بنجاهد
ونيلك غنـّـى لجهادك .
وبيصبح عليك بدري
وفرحان بك .
وبيقول لك فداك عمري
وبيحبك .
صباح الخير يا وش الخير
يا إبن النيل .
صبــــــــــاح الخيـــــــــــر
كريم أصل الكرم طبعك
ورثت النيل وعن جدك .
حليم والصفح من شرعك
ووقت الجد مين قدك .
شرار نارك
بيفني الظالم العادي .
وفي ديارك
طيور المجد بتنادي .
صباح الخير يا وش الخير
يا أبن النيل .
******
أنا بنت النيل المصرية
……..
أنا بنت النيل المصريّة
بكفاحي أصون الحريّة .
وأوفي الدين اللي عليا
بجهادي وروحي وعنيّا .
أنــــا بنـت النيـــل المصريّة
ح اتطوع واخدم أوطاني
وأصون النيل اللي رواني .
بحياتي أدافع وكياني
أنا وابني وأهلي وخلآني .
أنــــا بنـت النيـــل المصريّة
ماخلاص راح ليل العبوديّة
وبقينا ف عهد جديد تاني .
أنصر من مد إديه ليّا
وأعادي بقوّة اللي عداني .
أنــــا بنـت النيـــل المصريّة
المجد بنيته بجهادي
لأولادي وأولاد أولادي .
أمجادكم تصبح أمجادي
مصرية وطول عمري أنادي .
أنــــا بنـت النيـــل المصريّة
******
إلـي العمــل
……..
إلى العمل إلى العمل
ح تنول مرادك والأمل .
إلى العمـــــــــل
إلى العمل شغلك هناك مستنظرك
فـين همتـــك .
إسعى بهمة والإله ح يقدرك
على صنعتــك .
وانت وأنا
إلى العمـــــل .
دا عزمنا
عايـز العمــل .
ح تنول مرادك والأمل
إلى العمل إلى العمل .
إلى العمـــــــــل
إلى العمل واحمي الصناعة بقوتك
تحمي البلد .
عزمك لوحدك بيه ح تعلا أمتك
قوم واجتهد .
شــرع الحيـاة
إلى العمــل .
وارضي الإلــه
وقت العمـل .
ح تنول مرادك والأمل
إلى العمل إلى العمل .
إلى العمـــــــــل
إلى العمل تعيش حياتك بالشرف
وبقــــوتك .
بالإجتهاد إسمك ح يعلا وتتعرف
بين عزوتك .
إيدي في إيديك
إلى العمــل .
فتح عنيك
وقت العمـل .
ح تنول مرادك والأمل
إلى العمل .. إلى العمل .
******
نشيد الأتحاد قوة
……..
ساير بإذن الله
على ضي نهضتنا .
واحد كريم بدعاه
نحمي عزتنا .
ســـــايــــــر بــــإذن الله
زرعة في أولها
إخلاصنا يحميها .
ف نهارها وف ليلها
بالجد نرويها .
تطرح ثمر نادي
ويدوم على بلادي .
فيه عزّتي محلاه
زاهي بإذن الله .
ســـــايــــــر بــــإذن الله
إديك على إديـّه
أمجادنا نبنيها ..
وبالعزم والنيّة
حارسين رواسيها .
وح تعلا بجهادنا
والمجد رائدنا .
فيه عزّتي محلاه
ساير بإذن الله .
ســـــايــــــر بــــإذن الله
الإتحاد قوّة
والضعف يفرقنا .
سر النجاح هوّه
يــا رب وفـّقنــا .
وبالنظام تحلا
وبالعمل نعلا .
فيه عزّتي محلاه
ساير بإذن الله .
ســـــايــــــر بــــإذن الله
******
عيـد الأعيـاد
……..
عيد الأعياد أهو هل وعاد
وفرحنا به .
والفرح معاه يا حبايب زاد
وفتح بابه .
عيـــــــــــد الأعيــــــــــاد
ثورة أبطال جمعتنا رجال
في ميدان الفدا والتضحية .
وبقينا ف عزة وف استقلال
ودي نصرة من المولي قوية .
وف كل مكان الفرح أهو زاد
وفتح بابه .
عيد الأعياد أهو هل وعاد
وفرحنا به .
عيـــــــــــد الأعيــــــــــاد
وف كل الدول العربية
أحبابنا يباركم ويهنوا .
يوم عيد ثورتنا المصرية
من نبض قلوبهم بيغنّوا .
وف كل مكان الفرح اهو زاد
وفتح بابه .
عيد الأعياد أهو هل وعاد
وفرحنا به .
عيـــــــــــد الأعيــــــــــاد
******
الريــف نهــض
……..
الريف نهض يا فرحته
شمس المعالي صحته .
وأهله جاموا للكفاح
يا دنيا غني لنهضته .
الريـــف نهــــــــض
فلاح يابوي وسلاحي فاسي
يعدل ف جبال .
وتملي راجل وعقلي براسي
وشديد حمّال .
ده غير إيماني أنا بالله
والرزق حلال .
الريـــف نهــــــــض
الجهل روّح م البلد
يقعد وليه... ؟!
والعلم دا احسن سند
نعيشوا عليه .
ماعاد مرض
يستنى ليه.. ؟!
والليل طلع له صباح
في الريف وبانت عزته .
وأهله لاقوا نجاح
يا دنيا غني لفرحته .
الريـــف نهــــــــض
قوم للمعالي يا ولد
يابوي دا عزمك شديد .
بالهمة ح تعلا البلد
والخير على إيدك يزيد .
أخوك في جِبلي بهمتك
وف بحري يعرف نهضتك .
الريـــف نهــــــــض
******
مهرجــان القطـن
……..
عيد الهنا عيده
وغنوا يوم عيده .
دا قطننا الغالي
يا ربنا زيده .
دي فرحته الحلوة
فرحة برسمالها .
وغنوته غنوة
قلوبنا بتقولها .
واللي رواه نيلنا بشهده
سقاه وهناه مبن أده .
دا قطننا الغالي
يا ربنا زيده .
عيـــد الهنــا عيــــده
في مجلسه العالي
ع الخضرة بينـوّر .
على الدوام غالي
سبحانه من صـوّر .
على النسيم لوزته تصبّح
يناجيها وبحسنها يفرح .
دا قطننا الغالي
يا ربنا زيده .
عيـــد الهنــا عيــــده
العيلة واللمة
هنتها خيراتك .
يا خير على الأمة
تتهني بحياتك .
تعيش لنا ويدوم خيرك
مين للبلد يا جميل غيرك .
دا قطننا الغالي
يا ربنا زيده .
عيـــد الهنــا عيــــده
******
(( أغـانـي متنـوعـة ))
……..
القــط وخنــاقـه
……..
القط بيعشق خنّاقه
وعذابه وجرحه بقم داؤه .
يتنطط يلعب ويلاغي
ويصرّخ ويقول يا دماغي .
أنا بغرق بإيدين خنـّاقي
لكن أنا عاشق مش بإيديا .
ما أهجر خناقي ولو ثانيه
بكاني أو عذّب فيا .
ما انا دايب ف عيونه
وبروحي بحبه وبصونه .
وغرامي دا مرضي ودائي
لو بغرق بإدين خناقي .
والقط بيعشق خناقه
وعذابه وجرحه بقم داؤه .
******
وفــــاء
……..
عصفوره بين الغصون
هايمة وحيرانة .
باتت عليها الشجون
للورد عطشانة .
بشوق تميل على الورود
وتحكي ما بيها .
وعود يداعب عود
يميل يواسيها .
في عيونها قصة غرام
فيها الوفا باين .
ياريته شوق ودوام
جميل ومش هاين .
سألت روض الجمال
إيه سر شكوتها .
قال لي فاتتها الآمال
في عز فرحتها .
وعدت أليفها الوحيد
جالها بأنغامه .
غدر بيه صيّاد وعنيد
وصابه بسهامه .
فاتت عليها السنين
وهي على حالها .
يضني فؤادها الحنين
والشوق بيشغلها .
تيجي لأليفها تناديه
فاكراه بيسمعها .
راح وفين تلاقيه
ياكتر تلويعها .
يا روض واسيها بحنان
شريدة مش عارفة .
قلبها خانه الزمان
لكنها للوفا عاشقة .
******
التفـــاح
……..
فوق الغصون قناديل قناديل
والورد فوق خدّك مرتاح .
يا زينه البستان يا جميل
يا فرحة لقلوبنا يا تفّاح .
يــــا تفـــــاح
ريحة وحلاوة تهني العين
وللقلوب شهدك ترياق .
وطول حياتك حلوّ وزين
وكلّنا في حبّك عشّاق .
يا قلل شربات
حلو يا تفاح .
هات شهدك هات
حلو يا تفاح .
يا زينه البستان يا جميل
يا فرحة لقلوبنا يا تفاح .
يــــا تفـــــاح
الفجر يطلع بيصّحيك
ويفيض عليك يا جميل بنداه .
ونيل بلدنا الغالي راويك
إيه كل ده .. الله الله .
يا قلل شربات
حلو يا تفاح .
هات شهدك هات
حلو يا تفاح .
يا زينة البستان يا جميل
يا فرحة لقلوبنا يا تفاح .
يــــا تفـــــاح
مع النسيم عودك ميّال
وتميل قلوبنا يا حلو معاك .
يا شهد صافي يا سحر حلال
وكل أرواحنا بتهواك .
يا قلل شربات
حلو يا تفاح .
هات شهدك هات
حلو يا تفاح .
يا زينة البستان يا جميل
يا فرحة لقلوبنا يا تفاح .
******
الغطــاس
……..
حبيب البحر من يومه
عزيز ع الموج عزيز على الناس .
تعوم أرواح على عومه
ومين ينساه وده الغطاس .
بإسم الشط بيغني
ومين معرفش مقداره .
ملاك على البر مستني
بيحرس كل زواره .
سواعده الموج بيخشاها
جمايله ما حد ينساها .
عزيز على الموج عزيز على الناس
ومين ينساه وده الغطاس .
يبيع إخلاص ويتوصّي
إيمانه بربه رسماله .
وعنده للبحار قصة
عناد الموج كتبهاله .
وياما الرمل يحكيله
ويسمع له ويروي له .
عزيز على الموج عزيز على الناس
ومين ينساه وده الغطاس .
نغم صفارته بيشجينا
حنان بيواسي أرواحنا .
ولو ننسي تصحينا
وتدعينا لأفراحنا .
وأخبار الأمان عنده
وعمر الموجة ما تعانده .
عزيز على الموج عزيز على الناس
ومين ينساه وده الغطاس .
******
ليست هناك تعليقات:
إرسال تعليق